لاہور : ملک کے مختلف حصوں میں برفباری اور بارشوں نے سردی کی شدت میں مزید اضافہ کر دیا ہے، جس کے باعث عوام نے بڑی تعداد میں سیاحتی مقامات کا رخ کیا۔ گلیات، نتھیا گلی اور ٹھنڈیانی میں موسم سرما کی پہلی برفباری ہوئی، جس نے ان علاقوں کا منظر جنت کا سا بنا دیا۔ ایبٹ آباد اور اس کے گردونواح میں بھی بارش نے سردی میں اضافہ کیا، جب کہ میرپور شہر اور گردونواح میں بارش نے موسم کو مزید سرد بنا دیا۔
اسلام آباد میں بھی خوب بارش ہوئی، جس سے شہر کا موسم خوشگوار ہوگیا۔ لاہور کے مختلف علاقوں میں بوندا باندی اور سرگودھا شہر میں تیز بارش نے موسم کو ٹھنڈا کر دیا۔ خیبرپختونخوا میں بھی موسم کا رنگ بدل گیا، پشاور میں بارش کے بعد سردی کی شدت میں اضافہ ہوگیا، جبکہ مردان اور سوات کے بالائی علاقوں کالام اور مالم جبہ میں برفباری کا سلسلہ دوسرے روز بھی جاری رہا۔
بلوچستان کے مختلف اضلاع جیسے زیارت، چمن، کان مہترزئی اور توبہ اچکزئی میں بھی برفباری ہوئی، اور پشین، قلعہ عبداللہ، قلعہ سیف اللہ اور قلات میں بارش کا سلسلہ جاری ہے۔
حکام نے پیش گوئی کی ہے کہ آج رات اور یکم جنوری کے دوران ناران، کاغان، دیر، سوات اور کوہستان میں مزید برفباری ہو سکتی ہے۔ مانسہرہ، ایبٹ آباد، شانگلہ، استور، ہنزہ اور اسکردو میں بھی برفباری کی توقع ہے۔
برفباری سے سڑکوں کے بند ہونے اور پھسلن کی وجہ سے ٹریفک کی روانی متاثر ہو سکتی ہے۔ بالائی خیبر پختونخوا، کشمیر اور گلگت بلتستان کے پہاڑی علاقوں میں لینڈ سلائیڈنگ اور برفانی تودے گرنے کا بھی خطرہ ہے۔ تاہم، پنجاب اور بالائی سندھ میں دھند کی شدت میں کمی متوقع ہے، جس سے سفر کے دوران سہولت مل سکتی ہے۔
