لندن: بالی ووڈ سپر اسٹارز شاہ رخ خان اور کاجل نے لندن کے لیسٹر اسکوائر میں اپنی مشہور فلم ’دل والے دلہنیا لے جائیں گے‘ کے مرکزی کردار راج اور سمرن کے لائف سائز برانز مجسمے کی نقاب کشائی کی۔ یہ تقریب فلم کی 30 سالہ کامیابی اور عالمی اثرات کو خراجِ تحسین پیش کرنے کے لیے منعقد کی گئی۔
اس موقع پر دونوں اداکاروں نے مداحوں کے ساتھ تصاویر بنوائیں اور اپنے جذبات کا اظہار کیا۔ شاہ رخ خان نے انسٹاگرام پر خوشی کا اظہار کرتے ہوئے کہا کہ لندن میں راج اور سمرن کا برانز مجسمہ دیکھ کر انہیں بے حد خوشی ہوئی۔ انہوں نے مداحوں کو دعوت دی کہ جب بھی لندن آئیں، مجسموں کے ساتھ تصاویر ضرور بنوائیں۔
’سینز ان دی اسکوائر‘ ٹریل میں دنیا بھر کی مشہور فلموں کے کرداروں کے مجسمے شامل ہیں، جیسے ہیری پوٹر، مسٹر بین، بریجٹ جونز، مریم پاپنس اور بیٹ مین۔ اس ٹریل میں وہ مقامات بھی شامل ہیں جہاں سے مشہور فلمی مناظر شوٹ ہوئے۔
یاد رہے کہ ’دل والے دلہنیا لے جائیں گے‘ 1995 میں ریلیز ہوئی تھی اور اس نے 102.5 کروڑ بھارتی روپے کی شاندار کمائی کر کے اُس سال کی سب سے زیادہ کمائی کرنے والی بھارتی فلم کا اعزاز حاصل کیا۔ آج بھی یہ فلم دنیا بھر میں بے حد مقبول ہے اور مداحوں کی یادوں میں زندہ ہے۔
