اسلام آباد :قومی اسمبلی میں وزیر قانون اعظم نذیر تارڑ نے کہا ہے کہ تحریک انصاف نے استعفے دے کر خود خلا پیدا کیا، اور اگر پی ٹی آئی ایوان میں رہتی تو معاملات اتنے خراب نہ ہوتے۔
وزیر قانون نے واضح کیا کہ سیاست اور فسطائیت میں فرق ہوتا ہے اور مسائل کا حل مذاکرات کے ذریعے نکلتا ہے۔ انہوں نے کہا کہ پارلیمان کی عزت ہم سب کے لیے عزیز ہے اور پی ٹی آئی کا اسمبلی چھوڑنے کا فیصلہ غلط تھا۔
اعظم نذیر تارڑ نے گورنر راج کے حوالے سے کہا کہ یہ آئینی عمل ہے، مارشل لا نہیں، اور حالات ٹھیک نہ ہونے کی صورت میں اس کا اختیار استعمال کیا جا سکتا ہے۔ انہوں نے مزید کہا کہ تاریخ معاف نہیں کرتی، اور جو بھی غلطیاں کرے گا وہ نظر آئیں گی۔
وزیر قانون نے سابق وزیراعظم نواز شریف کی اقتدار سے ہٹانے کے بعد اسلام آباد پر حملے کے حوالے سے کہا کہ ایسا نہیں ہوا، اور وزیراعظم کی جانب سے کہا گیا “پاکستان ہے تو ہم سب ہیں” کے تناظر میں اقدامات کیے گئے۔
انہوں نے صحافیوں کو مشورہ بھی دیا کہ معاملات کو دیوار کے ساتھ لگا کر نہ دیکھیں، اور مسائل کا حل بحث اور مذاکرات کے ذریعے تلاش کریں۔
