ٹی ٹوینٹی ورلڈ کپ فائنل بارش ہوئی تو کیا ہو گا ؟

ویب ڈیسک : (طیبہ نقشی )  بھارت اور جنوبی افریقہ کے درمیان آئی سی سی ٹی 20 ورلڈ کپ کے فائنل میچ کیلئے انتظار کی گھڑیاں ختم ۔ تاج کس کے سر پر سجے گا فیصلہ آج ہوگا۔ لیکن بارش ہوئی تو فتح کس کے حصے میں آئے گی؟

ٹورنامنٹ کے فاتح کا نام آج رات ہی سامنے آ جائے گا۔ اس میچ میں سب کی نظریں جنوبی افریقی ٹیم پر ہوں گی کیونکہ اس نے پہلی بار کسی آئی سی سی ٹورنامنٹ کے فائنل میں جگہ بنائی ہے۔

بھارتی ٹیم گزشتہ کئی آئی سی سی فائنلز میں شکست کی مایوسی کو ٹرافی میں تبدیل کرنا چاہے گی۔ اس میچ پر بارش کا بھی سایہ ہے اور اگر میچ نہیں ہوا تو فاتح کا فیصلہ کیسے ہو گا۔ ہم آپ کو اس سوال کا جواب دیتے ہیں۔

آئی سی سی ٹی ٹوینٹی ورلڈ کپ کے فائنل میں آج رات بھارت اور جنوبی افریقہ کے درمیان میچ ہو گا۔ روہت شرما کی قیادت میں  بھارتی ٹیم گزشتہ سال ون ڈے ورلڈ کپ کے فائنل میں آسٹریلیا کے خلاف شکست سے مایوس ہوئی تھی۔ اس سے پہلے اسی ٹیم نے اسے آئی سی سی ٹیسٹ چیمپئن شپ کے فائنل میں بھی شکست دی تھی۔

اس بار ہندوستان نے سپر 8 میں آسٹریلیا کو شکست دی تھی جبکہ انگلینڈ کو سیمی فائنل میں باہر کا راستہ دکھایا ۔ پچھلی بار اس ٹیم نے ٹی 20 ورلڈ کپ کے سیمی فائنل میں ہندوستان کو شکست دی تھی۔ اگر جنوبی افریقہ یہاں جیت جاتا ہے تو وہ پہلی بار آئی سی سی ٹرافی پر قبضہ کرے گا۔

بھارت اور جنوبی افریقہ کے درمیان ہونے والے آئی سی سی ٹی 20 ورلڈ کپ کے فائنل میں 190 منٹ کا اضافی وقت رکھا گیا ہے۔ اگر یہ میچ آج نہیں ہوسکا تو اسے ریزرو ڈے یعنی 30 جون کو مکمل کیا جائے گا۔ آئی سی سی نے فائنل میچ کے لیے ریزرو ڈے رکھا ہے۔ اگر بارش کی وجہ سے ریزرو ڈے پر بھی میچ نہیں کھیلا جا سکا تو ٹورنامنٹ کا مشترکہ فاتح قرار دیا جائے گا۔ اس کا مطلب ہے کہ  بھارت اور جنوبی افریقہ دونوں کو T20 ورلڈ کپ کا فاتح قرار دیا جائے گا۔