سڈنی : ہالی وڈ اداکارہ مارگوٹ روبی نے اپنی نئی فلم وتھرنگ ہائٹس کے لاس اینجلس پریمیئر پر ایک ایسا نایاب ہار پہنا جس نے فیشن کے ساتھ ساتھ تاریخ اور نوآبادیاتی ورثے کے حوالے سے ایک نئی بحث شروع کر دی۔ ووگ میگزین کے مطابق، یہ ہار مغل ملکہ نور جہاں سے منسوب ایک صدیوں پرانا تاج محل ہیرے کا ہار ہے، جو ماضی میں مشہور اداکارہ الزبتھ ٹیلر کی ملکیت بھی رہا ہے۔
مارگوٹ روبی کی فلم وتھرنگ ہائٹس 13 فروری کو ریلیز ہو رہی ہے، جس میں وہ جیکب ایلورڈی کے ساتھ مرکزی کردار ادا کر رہی ہیں۔ یہ فلم ایملی برونٹے کے مشہور گوتھک ناول پر مبنی ہے، جسے یارکشائر کے اداس مناظر میں نیا انداز دیا گیا ہے۔ فلم کے پریمیئر کے موقع پر روبی نے معروف ڈیزائنر سکیاپاریلی کا خصوصی کوتور لباس پہنا، لیکن اصل توجہ ان کے گلے میں موجود اس نایاب ہار پر مرکوز رہی۔
یہ دل کی شکل کا قیمتی ہیرا، جیڈ میں جڑا ہوا ہے اور سونے، روبی اور ڈائمنڈ سے تیار کردہ چین کے ساتھ آویزاں ہے۔ فیشن میگزین ووگ کے مطابق، ہار پر فارسی میں ایک عبارت کندہ ہے جس کا اردو ترجمہ ہے “محبت ہمیشہ قائم رہتی ہے”۔ اس پر ملکہ نور جہاں کا نام بھی درج ہے۔
روایات کے مطابق، یہ ہار مغل بادشاہ جہانگیر نے اپنی اہلیہ نور جہاں کو محبت کی علامت کے طور پر تحفے میں دیا تھا۔ تاریخی طور پر، یہ زیور بعد میں ملکہ ممتاز محل تک پہنچا، جو شاہ جہان کی اہلیہ تھیں، اور اسی مضبوط تعلق کی بنا پر اسے تاج محل ڈائمنڈ کہا جانے لگا۔
صدیوں بعد یہ نایاب ہار یورپی جیولری برانڈ کارٹیئر کے پاس پہنچا، جہاں اسے نئے انداز میں ڈیزائن کیا گیا۔ 1972 میں کارٹیئر کے صدر نے یہ ہار اداکارہ الزبتھ ٹیلر کو ان کے شوہر رچرڈ برٹن کی طرف سے تحفے میں دیا، اور پھر 2011 میں الزبتھ ٹیلر کے انتقال کے بعد یہ ہار نیلامی میں 88 لاکھ ڈالر میں فروخت ہوا، جو اس وقت انڈین زیورات کے کسی آئٹم کی تاریخ میں ریکارڈ قیمت تھی۔
مارگوٹ روبی کی جانب سے اس ہار کا پہنا جانا ایک نئی بحث کا باعث بھی بنا ہے، کیونکہ یہ قیمتی زیور ان ہزاروں نوادرات میں شامل ہے جو نوآبادیاتی دور کے دوران بھارت سے باہر لے جائے گئے تھے۔ اس وقت بھارت برطانیہ اور دیگر ممالک سے اپنے تاریخی خزانے واپس کرنے کا مطالبہ کر رہا ہے، جن میں شاہی خاندان کا کوہِ نور ہیرا بھی شامل ہے۔
