ویب ڈیسک: کینیڈا میں پارلیمانی انتخابات کے لیے پولنگ آج ہو گی، جس میں لبرل پارٹی کے امیدوار اور کینیڈا کے وزیر اعظم مارک کارنی اور کنزرویٹو پارٹی کے پیئر پولی ایو کے درمیان کانٹے کا مقابلہ متوقع ہے۔
بین الاقوامی میڈیاکے مطابق مارک کارنی، جو کہ سابق مرکزی بینکر اور وزیر اعظم جسٹن ٹروڈو کے جانشین ہیں، کا مقابلہ کیریئر سیاستدان پیئر پولی ایو سے ہے، جن کے بارے میں عمومی تاثر یہ ہے کہ وہ امریکی صدر ڈونلڈ ٹرمپ کی طرح ہیں۔ پیئر پولی ایو نے اپنی انتخابی مہم کا اختتام ٹورنٹو میں کیا، اور ان کی مہم کے آخری لمحوں میں ڈونلڈ ٹرمپ کا سایہ واضح طور پر محسوس کیا گیا۔
رائے عامہ کے جائزوں کے مطابق، پیئر پولی ایو کی کنزرویٹو پارٹی ابتدائی طور پر 25 پوائنٹس کی برتری کے ساتھ آگے تھی، لیکن جب وزیر اعظم جسٹن ٹروڈو نے جنوری میں اپنے استعفے کا اعلان کیا، تو سیاسی منظرنامہ تبدیل ہو گیا۔ مارچ میں لبرل پارٹی نے مارک کارنی کو پارٹی کی قیادت سونپی، جنہوں نے فوراً عام انتخابات کرانے کا اعلان کیا۔
اس دوران کینیڈا اور امریکا کے تعلقات کشیدہ ہو گئے، جب ڈونلڈ ٹرمپ نے کینیڈا پر ٹیرف لگائے اور کینیڈا کو امریکا کی 51 ویں ریاست بنانے کی بات کی۔ ان سیاسی اور تجارتی عوامل نے لبرل پارٹی کو دوبارہ رائے عامہ میں برتری دلوا دی ہے۔
Source link
