دبئی: پاکستان نے انڈر 19 ایشیا کپ کے فائنل میں بھارت کو 348 رنز کا ہدف دے دیا ہے۔ بھارت کے خلاف ٹاس جیت کر پہلے فیلڈنگ کرنے کا فیصلہ کرنے والی بھارتی ٹیم کے خلاف پاکستان کی بیٹنگ لائن نے شاندار کھیل کا مظاہرہ کیا، جس کی قیادت نوجوان بیٹسمین سمیر منہاس نے کی۔
پاکستان نے مقررہ 50 اوورز میں 8 وکٹوں کے نقصان پر 347 رنز اسکور کیے۔ اس میچ میں سب سے نمایاں کھلاڑی سمیر منہاس رہے، جنہوں نے 17 چوکے اور 9 چھکے لگاتے ہوئے دھواں دھار 172 رنز بنائے۔ ان کی اننگز میں 103 رنز صرف 71 گیندوں پر بنائے، اور وہ اس ٹورنامنٹ کے ٹاپ اسکورر ہیں۔
سمیر کے علاوہ احمد حسین نے 56، عثمان خان نے 35، کپتان فرحان یوسف نے 19 اور حمزہ ظہور نے 18 رنز بنائے۔ محمد صیام اور نقاب شفیق بالترتیب 13 اور 12 رنز کے ساتھ ناٹ آؤٹ رہے۔
بھارت کی جانب سے دپیش دیوندرن نے 3، کھیلان پٹیل اور ہینل پٹیل نے 2-2 کھلاڑیوں کو آؤٹ کیا۔
پاکستان کے کپتان فرحان یوسف نے میچ کے بعد گفتگو کرتے ہوئے کہا، “ہماری ٹیم پوری تیاری کے ساتھ میدان میں اتری ہے اور ہم ٹائٹل جیتنے کی بھرپور کوشش کریں گے۔ ٹیم کا مورال بلند ہے اور ہم فائنل میں بہترین کارکردگی دکھانے کے لیے پُرعزم ہیں۔”
پاکستان کی انڈر 19 ٹیم نے اس ٹورنامنٹ میں شاندار کھیل کا مظاہرہ کیا ہے، اور سیمی فائنل میں بنگلہ دیش کو 8 وکٹوں سے شکست دے کر فائنل میں جگہ بنائی تھی۔ بھارت نے بھی دوسرے سیمی فائنل میں سری لنکا کو ہرایا تھا۔
پاکستان کی بیٹنگ اور بولنگ دونوں ہی مضبوط ہیں، جہاں سمیر منہاس 299 رنز کے ساتھ ٹورنامنٹ کے سب سے بڑے اسٹرائیکر ہیں، اور عبد السبحان 11 وکٹوں کے ساتھ بولنگ میں سب سے نمایاں ہیں۔
پاکستان کی ٹیم دو بار آئی سی سی انڈر 19 ورلڈ کپ جیت چکی ہے، لیکن ایشیا کپ کی ٹرافی اب تک اس کے حصے میں نہیں آئی۔ البتہ، 2012 میں پاکستان بھارت کے ساتھ مشترکہ چیمپئن رہا تھا۔
