پاکستان کے ویٹرن ٹینس کھلاڑی حمید الحق نے تھائی لینڈ کے شہر پتایہ میں ہونے والی آئی ٹی ایف سینئر چیمپئن شپ میں شاندار کارکردگی کا مظاہرہ کرتے ہوئے اسرائیلی کھلاڑی زیولیون کو سخت مقابلے کے بعد شکست دے کر ٹائٹل اپنے نام کر لیا۔
حمید الحق نے یہ اعزاز سینئر کیٹیگری میں حاصل کیا، جہاں انہوں نے چھ چار، تین چھ اور دس دو کے اسکور سے کامیابی حاصل کی۔ میچ سخت اور سنسنی خیز تھا لیکن فیصلہ کن سیٹ میں حمید الحق نے مکمل طور پر حاوی رہتے ہوئے اسرائیلی حریف کو بے بس کر دیا۔
یہ فتح نہ صرف پاکستانی ٹینس کے لیے ایک قابلِ فخر لمحہ ہے بلکہ عالمی سطح پر پاکستانی ویٹرن ایتھلیٹس کی مسلسل محنت اور عزم کا ثبوت بھی ہے۔
حمید الحق کی اس کامیابی پر پاکستان ٹینس فیڈریشن اور کھیلوں کے شائقین کی جانب سے مبارکباد کے پیغامات کا سلسلہ جاری ہے۔
