گڑھی خدا بخش: چیئرمین پیپلز پارٹی بلاول بھٹو زرداری نے گڑھی خدا بخش میں جلسے سے خطاب کرتے ہوئے کہا کہ اس سال کی سب سے بڑی کامیابی بھارت کو شکست دینا ہے، اور یہ جیت پوری قوم کی کامیابی ہے۔ انہوں نے کہا کہ پاکستان کی یہ فتح دنیا بھر میں قدر کی نگاہ سے دیکھی گئی اور بھارتی وزیراعظم مودی فیلڈ مارشل کا نام سنتے ہی چھپ جاتے ہیں، کیونکہ بھارت ابھی تک اپنی شکست کو ہضم نہیں کر سکا۔
بلاول بھٹو زرداری نے کہا کہ بھارتی طیاروں کو گرائے جانے والے طیارے صدر آصف علی زرداری نے منگوائے تھے، اور بھٹو کی قیادت کی بدولت ملک کو میزائل ٹیکنالوجی حاصل ہوئی۔ انہوں نے کہا کہ معرکۂ حق میں بھارتی جارحیت کا منہ توڑ جواب دیا گیا اور یہ پاکستان کی دفاعی طاقت کی علامت ہے۔
چیئرمین پیپلز پارٹی نے ملکی سیاسی اور اقتصادی امور پر بھی بات کرتے ہوئے کہا کہ پارلیمنٹ نے اس سال 27ویں آئینی ترمیم منظور کی، اور اس میں شامل متنازع شقوں کو ختم کرایا گیا۔ بلاول بھٹو نے کہا کہ وفاق اپنی ذمہ داریاں پوری کرکے ملک کے معاشی بحران کو دور کرے گا، اور صوبوں کو ٹیکس وصولیوں میں مزید ذمہ داریاں دی جائیں تاکہ اختیار چھیننے کی بجائے صوبائی کردار مضبوط ہو۔
انہوں نے مزید کہا کہ وفاق کے مسائل اور پریشانیاں پارٹی کے لیے ذاتی ذمہ داری ہیں، اور چونکہ صوبوں کی زنجیر کا حصہ ہیں، ان کی ذمہ داری اور بڑھ جاتی ہے۔ بلاول بھٹو نے زور دیا کہ پیپلز پارٹی ہر سطح پر وفاق، صوبوں اور عوام کی خدمت جاری رکھے گی اور ملکی استحکام کے لیے اپنا کردار ادا کرتی رہے گی۔
