کراچی: پاکستانی شوبز انڈسٹری کی معروف اداکارہ سجل علی اور اداکار حمزہ سہیل ایک بار پھر سوشل میڈیا پر اپنی ممکنہ شادی کی افواہوں کی وجہ سے زیر بحث ہیں۔ مختلف انسٹاگرام اکاؤنٹس پر یہ دعویٰ کیا جا رہا ہے کہ دونوں 2026 میں شادی کے بندھن میں بندھ سکتے ہیں، جس پر مداحوں میں جوش و خروش کی لہر دوڑ گئی ہے۔
تاہم سجل علی نے انسٹاگرام اسٹوری کے ذریعے ان افواہوں کی تردید کی اور مداحوں سے اپیل کی کہ وہ بغیر تصدیق شدہ خبریں نہ پھیلائیں۔ انہوں نے کہا، “ارے دوستوں، اگر کبھی کوئی ذاتی خبر ہوگی تو میں خود ہی آپ کو بتاؤں گی۔”
سجل علی پاکستانی ڈرامہ انڈسٹری کی ایک ورسٹائل اور باصلاحیت اداکارہ کے طور پر جانی جاتی ہیں۔ انہوں نے “یقین کا سفر”, “چپ رہو”, “یہ دل میرا” اور “آنگن” جیسے مقبول ڈراموں میں اپنے شاندار کرداروں کے ذریعے بے شمار چاہتیں حاصل کیں۔ دوسری جانب، حمزہ سہیل نے بھی “فیری ٹیل سیزن 1 اور 2”, “زرد پتوں کا بن”, اور “دل والی گلی” جیسے پروجیکٹس میں اپنی شناخت بنائی ہے۔
سوشل میڈیا پر دونوں اداکاروں کی ممکنہ شادی کے حوالے سے مداحوں کی آراء آنا جاری ہیں۔ ایک مداح نے کہا کہ انہیں پہلے ہی اندازہ تھا کہ ایسا کچھ ہو سکتا ہے کیونکہ حمزہ سہیل ایک باوقار شخصیت کے حامل ہیں، جبکہ ایک اور مداح نے سجل علی کی خوشیوں کے لیے دعا کی اور ان کی زندگی میں خوشیوں کی بھرپور آمد کی خواہش ظاہر کی۔
مداحوں کی اکثریت اس جوڑی کے لیے نیک تمناؤں کا اظہار کر رہی ہے اور امید کر رہی ہے کہ یہ افواہیں حقیقت بنیں۔
