ویب ڈیسک: رمضان المبارک 2026 کی آمد میں تقریباً 40 دن سے بھی کم وقت رہ گیا ہے اور دبئی میں اس مقدس مہینے کی تیاریوں کا آغاز ہو چکا ہے۔ حسبِ روایت، رمضان کے دوران دبئی کے شاپنگ مالز کے اوقات کار میں توسیع کی جائے گی۔
گزشتہ برسوں کی طرح اس بار بھی دبئی کے بیشتر شاپنگ سینٹرز دن بھر کھلے رہیں گے، تاہم افطار کے بعد شاپنگ مالز، ریسٹورنٹس رات گئے تک کھلے رکھنے کا امکان ہے۔
اگرچہ رمضان 2026 کے حتمی اوقات کار کا اعلان ابھی نہیں ہوا، تاہم توقع کی جا رہی ہے کہ زیادہ تر مالز رمضان 2025 کے شیڈول پر عمل کریں گے۔
مردف سٹی سنٹر اور سٹی سنٹر دیرہ کے صبح 10 بجے سے رات 1 بجے تک کھلے رہنے کا امکان ہے، جبکہ ریسٹورنٹس رات 2 بجے تک کھلے رہ سکتے ہیں۔
دبئی فیسٹیول سٹی مال اور سٹی واک کے رات 12 بجے تک کھلے رہنے کی توقع ہے، جبکہ وہاں موجود کھانے پینے کے مراکز رات 1 بجے تک خدمات فراہم کریں گے۔
عربین سینٹر، نخیل مال، ڈریگن مارٹ، آؤٹ لیٹ ولیج اور دیگر بڑے شاپنگ مقامات بھی اپنے اوقات کار میں تبدیلی کریں گے اور عام طور پر ہفتے کے دنوں میں آدھی رات تک جبکہ ویک اینڈ پر اس سے بھی زیادہ دیر تک کھلے رہیں گے۔
فوڈ کورٹس اور کیفے غیر روزہ دار افراد، بچوں، بزرگوں اور روزے سے مستثنیٰ افراد کو دن کے وقت بھی سروس فراہم کرتے رہیں گے، اس کے علاوہ ریسٹورنٹس خصوصی افطار مینیو اور رمضان آفرز متعارف کرائیں گے، جبکہ دبئی کے ہوٹلز روایتی اماراتی اور بین الاقوامی کھانوں پر مشتمل خصوصی افطار اور سحری انتظامات کی تیاری کریں گے۔
سینما گھروں کے اوقات کار میں بھی رمضان کے مطابق تبدیلی کی جائے گی۔ ووکس سینما، ریل سینما اور راکسی سینما کے دوپہر 1 یا 2 بجے کھلنے اور رات گئے تک چلنے کا امکان ہے۔
انتظامیہ نے شہریوں اور سیاحوں کو مشورہ دیا ہے کہ رمضان سے قبل مالز اور سینما گھروں کی آفیشل ویب سائٹس یا سوشل میڈیا پیجز سے تازہ ترین اوقات کار ضرور چیک کریں۔
