بنگلادیش میں اسٹارلنک انٹرنیٹ سروس کی منظوری جنوبی ایشیا میں دوسرا ملک بن گیا

ویب ڈیسک: بنگلادیش کی عبوری حکومت کے چیف ایڈوائزر پروفیسر محمد یونس نے سیٹلائٹ انٹرنیٹ فراہم کرنے والی کمپنی اسٹارلنک کو ملک میں خدمات کی فراہمی کے لیے لائسنس جاری کر دیا۔

مقامی میڈیا کے مطابق، سری لنکا کے بعد بنگلادیش جنوبی ایشیا کا دوسرا ملک بن گیا ہے جہاں ایلون مسک کی کمپنی اسٹارلنک اپنی سیٹلائٹ انٹرنیٹ سروس فراہم کرے گی۔

چیف ایڈوائزر کے خصوصی معاون برائے ڈاک، ٹیلی کمیونیکیشن اور انفارمیشن ٹیکنالوجی فیض احمد طیب نے کہا کہ اسٹارلنک کی بنگلادیش میں آمد ایک طویل عوامی مطالبہ تھا۔ خاص طور پر جولائی میں ہونے والی عوامی بغاوت کے دوران، جب شیخ حسینہ کی حکومت نے بار بار انٹرنیٹ سروس معطل کی، اس مطالبے میں مزید شدت آگئی تھی۔

فیض احمد طیب نے مزید کہا کہ چیف ایڈوائزر کی خواہش تھی کہ دنیا کو یہ پیغام دیا جائے کہ بنگلادیش سرمایہ کاری کے لیے ایک محفوظ اور سازگار ملک ہے۔

ان کا مزید کہنا تھا کہ دور دراز علاقوں، جزیروں، دشوار گزار پہاڑی علاقوں اور قدرتی آفات کا شکار ساحلی خطوں میں معیاری اور بلا تعطل انٹرنیٹ سروس فراہم کرنا اب ممکن ہو سکے گا، جو بنگلادیش کی ڈیجیٹل ترقی میں ایک سنگ میل ثابت ہوگا۔