لند ن : ادب اور تھیٹر کی دنیا کے معروف برطانوی ڈرامہ نگار ٹام سٹوپارڈ 88 برس کی عمر میں اپنے گھر پر، اہل خانہ کی موجودگی میں انتقال کر گئے۔ ان کے نمائندے کے مطابق، ٹام سٹوپارڈ کا انتقال پرامن انداز میں ہوا اور ان کی زندگی کا اختتام اپنے قریب ترین افراد کے درمیان ہوا۔
ٹام سٹوپارڈ کو اپنی فکری گہرائی اور منفرد تحریری صلاحیتوں کے سبب عالمی سطح پر پہچانا گیا۔ ان کے مشہور ترین کاموں میں 1998 کی فلم “شیکسپیئر ان لو” شامل ہے، جس کے لیے انہیں آسکر اور گولڈن گلوب ایوارڈز سے نوازا گیا۔
سٹوپارڈ کا تھیٹر کی دنیا میں سفر 1960 کی دہائی میں شروع ہوا اور ان کے مشہور ڈراموں میں “لیو پول”, “دی رئیل تھنگ”, “آرکیڈیا” اور “روزن کرانٹز” شامل ہیں۔ ان کے ڈرامے فلسفہ، سیاست، ادب اور انسانی جذبات کا حسین امتزاج تھے، جو ہمیشہ ناظرین کو گہری سوچ میں ڈبو دیتے تھے۔
ٹام سٹوپارڈ کے انتقال کی خبر نے دنیا بھر میں ادب اور تھیٹر کے شائقین کو غمگین کر دیا ہے۔ ان کے لطیف اور عمیق مکالمے، انسانی جذبات کی پیچیدگیوں کی عکاسی اور تخیل کے جادو کو ہمیشہ یاد رکھا جائے گا۔ برطانیہ کی حکومت نے ان کی تخلیقی خدمات کے اعتراف میں انہیں “سر” کے خطاب سے نوازا تھا، جو کہ ان کی فنی وراثت کا ایک قیمتی حصہ ہے۔
